නුඹ තවම හිස් කොලයක්

එදා වගේම 

අදත් මහ වැස්සක් 

හිත ඉල්ලනවා පෑනක්

ලියන්නට නුඹ ගැන කවියක්..

නොදැනීම ගෙවුනුමුත් වරුවක් 

නුඹ තවම හිස් කොලයක්

ගෙවුණාම තවත් වසරක් 

එකතු වුණි මහ කවි ගොඩක් 

සෙව්ව මුත් කවි අතරේ 

නුඹව, එක දවසක් 

ගොඩක් කවි අතරේ 

නුඹ තවම හිස් කොලයක්...

-සුපුන් උඩුගමකෝරාලගේ-

Breakfast system එක වෙනස්‌ කරන්න..!!!

මේ පහුගිය දිනවල විශාල වශයෙන් සිදු කෙරුණු වෙළෙද ප්‍රවර්ධන වැකියක්..

මේ මොකක්ද කරන්න කියන්නෙ... ආහාර රටාව වෙනස් කරන්න.. ආහාර රටාව කියන්නේ රටක සංස්කෘතිය...සංස්කෘතිය කියන්නේ අඳින ඇඳුම් පැළඳුම් විතරක් නෙවෙයි.. ඒකට මේ හැම දෙයක්ම අයිති වෙනවා.. හැම දෙයක්ම.. රටක සංස්කෘතිය තුළ තියෙන වැදගත්ම හා ප්‍රබලම දෙයක් වෙන්නේ ඒ රටේ ආහාර රටාව. ඒක ඒ රටට ආවේණික වූ දෙයක්. අපි දැනට මේ භුක්ති විඳින බොහෝ ලෙඩ රෝග වලට හේතුවක් වෙලා තියෙන්නේ අපේ සංස්කෘතිය වෙච්ච ඒ ආහාර රටාව වෙනස් කිරීම.. යම් කිසි රටක යම් ජන වර්ගයක අනන්‍යතාව තහවුරු කර පෙන්වන්න පුළුවන් එක සාධකයක් වන්නේ එම ජන සමාජයේ ආහාර රටාව යි. ආහාර රටාව වෙනස් වෙනවා කියන්නේ ඒ ජන සමාජයේ සංස්කෘතික වෙනස් වෙනවා කියන එක.. සංස්කෘතිය වෙනස් වෙනවා කියන්නේ තව දුරටත් එම ජනතාවට අනන්‍ය වූ ලක්ෂණ නෑ කියන එක.. ඒ කියන්නෙ එම ජන වර්ගය නැහැ.. සංස්කෘතිය වෙනස් කරන්න දගලන රැඩිකල් කියන නව පරපුරේ බොහෝ අය දන්නේ නෑ සංස්කෘතිය කියන්නේ ජන සමාජයම තමයි කියන එක.. ආහාර රටාව, සිරිත් විරිත්, ඇදුම් පැළදුම්, භාෂාව, මේ හැම දෙයකටම කියන තනි නම "සංස්කෘතිය".. කහ පාට උනාට හැම ආභරණයම රත්තරන් වෙන්නේ නෑ.. මොකද රත්තරන් වලට අදාල කොලිටි එකක් තියෙනවා.. ශ්‍රී ලාංකික හරි සිංහල කියල හරි නමක් තිබුණාට වැඩක් නෑ ඒ නම ඇතුලේ නමට අදාළ ටික නැත්නම්.. දැන් මේ breakfast style එක වෙනස් කරලා අපිට මොකක්ද කරන්න කියන්නේ.. පාන් වහල්ලක මාමයිට් ගාගෙන කන්න කියන එකද??? එහෙම නැත්නම් රොටියක මේක ගාගෙන කන්න ද???

-වෛද්‍ය සුපුන් උඩුගම කෝරාලගේ-

Quarantine, Stay Home හා වැඩිහිටි මානසික සෞඛ්‍ය

"Doctor මේ මෙතැනට මොකක් හරි වැටුණාම රිදෙනවා...”

රෝගියා සිය කකුලේ යම් තැනක් පෙන්වමින්

"ඒ කිව්වේ අම්මේ "

මට පැහැදිලි අදහසක් ගැනීමට නොහැකිව..

"නැ මහත්තයා මීට මාස තුනකට කලින් මාව වැටුණා, ඒ වෙලාවේ මගේ කකුලේ මේ මෙතැන මේ පැත්තට මෙව්වා උනා"

(මෙව්වා වීම යනු ලංකාවේ කිනම් හෝ වෛද්‍ය අධ්‍යාපනයක්  ලබන වෛද්‍ය සිසුන්ට සිය උපාධි අධ්‍යනය කාල සීමාව තුළ කෙසේවත් හමු නොවන, සීමාවාසික පුහුණුවේ දී පළමු වරට හඳුනා ගැනීමට ලැබෙන හා රාජකාරි කටයුතු සිදු කරන කාලයේදී ඉතා බහුලව හමුවන රෝග විශේෂයකි. මෙය මෙව්වා වීම, මෙහෙම වීම, පුටු කකුල වැදිලා මෙව්වා වීම, අත දොරට අසුවීමෙන් මෙව්වා වීම ආදී ලෙස අවස්ථා ගණනාවකි)

"ඒ වෙලාවේ බෙහෙත් කරලා හොඳ වුණා.. දැන් මාසයක ඉඳන් මෙතැනට මොකක් හරි වැටුණාම රිදෙනවා"

"ඒ කියන්නේ මේ වතුර බෝතලේ දැන් මම අම්මාගේ කකුල උඩට අතහැරියොත් රිදෙනවා"

මගේ මෙසේය මත වූ විදුරු බෝතලය ඇයට පෙන්වමින් මම ඇසුවෙමි..

"ඔව් ඔව් මහත්තයා දාලා බලන්නකෝ.. "

"දැන් ඇයි අම්මා එහෙම එක එක දේවල් කකුල උඩට දාන්නේ"

" නැ ඉතින්, මේ මෙහෙම අතින් තද කරත් රිදෙනවා "

එවර ඇය, සිය සම්පූර්ණ වෙර එක් අතකට යොදා වැරෙන් සිය පාදයේ අදාළ ස්ථානය තද කලහ..

"අම්මේ ඔය ගාණට තද කරොත් නම් මගේ කකුල වුණත් රිදෙනවා.. අනික එහෙම කකුල තද කරන්නේ මොකටද?? "

" නැ ඉතිං මම ඔය තද කරලා බලනවා රිදෙනවාද කියලා"....

ඇත්තටම ඒ මොහොතේ දී ඇයගේ පාදයේ කිසිදු වේදනාවක් හෝ වෙනත් අපහසුතාවයක් නොතිබිණි...

නමුත් හිත සැනසීමක් නම් අත්‍යවශ්‍යම වි තිබිණි..

-වෛද්‍ය සුපුන් උඩුගමකෝරාලගේ -

(චායාරුපය අන්තර්ජාලයනි.)

ස්ටාර් තරග හා ටික් ටොක්

මා සේවය කරන ආයුර්වේද මධ්‍යම බෙහෙත් ශාලාවට එක එල්ලේම පහලින් පිහිටා ඇත්තේ උත්සව ශාලාවක්. ඉතින් මාසයකට දෙතුන් වතාවක් නොමිලේ සංගීත රසය විඳින්න අවස්ථාව ලැබෙනවා ඒ එහි පැවැත්වෙන විවිධ වූ උත්සව අවස්ථා නිසා. පසුගිය දිනක එහි විවාහ උත්සවයක් පැවැත් වුණා. සමාන්‍යයෙන් එවැනි දිනකට උදෑසන සිට සවස් කාලය දක්වාම ඩී ජේ සංගීතය හෝ කණ්ඩායම් සංගීතයට සවන්දීමේ භාග්‍ය හිමි වෙනවා.. නන්දා මාලිනිය, සනත් නන්දසිරි, සුනිල් එදිරිසිංහ වැනි අය උදැසන ඉන්නකොට ටිකක් දවල් වෙනකොට රූකාන්ත ගුණතිලක, වගේ අය ඇවිල්ලා දවල් 2 පහු වෙනකොට සී ටී ප්‍රනාන්දු, එම් එස්, නිහාල් නෙල්සන් වගේ කට්ටියම එකතු වෙලා අන්තිමට ජිප්සීස්, මේරියන්ස්, සන්ෆ්ලවර් කණ්‌ඩායමක්‌ එක්ක මනාල යුවළ පිටත් වෙලා යන එක සාමාන්‍ය සම්ප්‍රදාය. මේ අතරතුර දෙපාර්ශවයේම නැගී එන ගායක ගායිකාවන් තම තමන්ගේ දක්ෂතාවය එළි දැක්වීම සිදු කෙරෙනවා. මම මේ කියන දවසේ එහි සංගීතය බාර වෙලා තිබුණේ ප්‍රදේශයේ සංගීත කණ්ඩායමකට ඔවුන් මනාලිය කැඳවාගෙන එන අවස්ථාව, කේක් කැපීම වගේම මනාලියගේ අම්මා හැඟුම්බර කරමින්..

රත්තරං දුවේ අපේ රත්තරන් දුවේ... 

වැනි ගීත ගායනා කරනවා.. මෙහෙම කාළය ගෙවිලා ගිහින් නටන වෙලාව ඇවිත්.. දැන් අපිට ඇහෙනවා වේග රිද්ම ගීත.. මේ අතරින් එකපාරටම ඇහෙනවා.. 

සදාදර නයෝ නුඹේ මංගල දිනේ..

ඇරයුම් නැතත් මා ආවා ප්‍රියේ...

ඊලඟට...

මිය යන්න සුදානම් පැරදුම දරන්..

සමරන්න එනවාද සුදු මල් අරන්...

මගේ ඊළඟ බලාපොරොත්තුව දැන් විශාල ගාලගෝට්ටියක් ඇති වෙයි.. මනාලයාට හොඳටම තරහ ගිහින් ඇත්තේ.. නැත්නම් මනමාලයාගේ යාළුවෝ...?? 

නෑ කිසිම වෙනසක් නෑ සාමාන්‍ය විදියට ගෙවිලා ගිය තවත් පැයක දෙකක කාලයකට පස්සෙ සුනිල් එදිරිසිංහ මහතා නැවතත් 

දුවේ.. නුඹ මාගෙ ප්‍රාණය යි... 

....... 

....... සනුහරේ අභිමානය යි... 

උත්සව සභාව සතුටින් විසිර ගියහ.. හොඳයි.. ඒත්..

අපේ රටේ සංගීතය, අපේ තරුණ පරපුර.. අඩුම තරමින් මංගල උත්සව අවස්ථාවකට ගායනා කළ යුතු ගීත ටික තෝරාගන්න බැරි නම්..

රටේ, තියෙන තරමක් රූපවාහිනී නාලිකා ඔස්සේ විකාශනය වන ලමුන් සදහා වූ රියලිටි වැඩසටහන් වලට එන ලමුන් කියන සින්දු ටික එක දවසක් අහගෙන ඉන්න මොනාද ඒ ලමයින් කියන්නේ.. වැරදීමකින්වත් ලමා ගිතයක් කියන්නේ නෑ. 

එක්තරා එවැනි වැඩසටහනකදි වයස අවුරුදු අටක විතර පුතෙක් ගායනා කරනවා 

හිත මිතුරු සුළඟ ළඟ එන වැහි වලාවට කියන්.... 

අද නොපැමිණ වෙන දිනයක වැසි රැගෙන එන ලෙසින්.. 

-වික්ටර් රත්නායක - 

ගායනය අවසන් ව මුළු ප්‍රේක්ෂකාගාරය ම අත්පොලසන් දෙනකොට තරග විනශ්චයකාරවරුන් විදිහට හිටපු අපේ රටේ ප්‍රවිණයෝ වන ගායක මාමා සහ ගායිකා නැන්දා ගේ ඇස් වල කඳුළු. 

"මට ඔයාව වඩා ගන්න ඕනේ" 

කියලා ඒ ප්‍රවීණ මාමා කියනකොට

"අති විශිෂ්ටයි පුතේ ඔයා මුල් ගායනයටත් වඩා හොඳින් ගායනා කළා" 

කියලා ඒ නැන්දා කියනවා.. 

තවත් එවැනිම තරගයක පුංචි දරුවෙක් ගායනා කරනවා 

මධූ චන්ද්‍ර යාමේ මෝදු වේ.. 

උන්මාදනීය රාත්‍රියේ..

අනංග දෙවොල් දල්වා දිපාවලී..

මධූ චන්ද්‍ර යාමේ...

කුස පබා චිත්‍රපටය වෙනුවෙන් කසුන් කල්හාර ගායනා කළ ශෘංගාරාත්මක ගීතය.. 

මනි සර් යනුවෙන් ඉන්දියානුවන් හදුන්වන මනිරත්නම් නම් විශිෂ්ට ගණයේ නිර්මාණ ශිල්පියා විසින් 90 දශකයේ මුල් භාගයේදී නිර්මාණය කළ බොම්බෙ චිත්‍රපටයේත් මෙවැනිම ගිතයක් අන්තර් ගත වුණා. මනීෂා කොයිරාල සමගින් අරවින්ද සාමි ශෘංගාරාත්මක රංගනය.. මෙම චිත්‍රපටයේ ගීත ලංකාවේත් අතිශය ජනප්‍රිය උනා.. මම මේ කතාව කිව්වේ සුනිල් ආරියරත්නයන් කුස පබා චිත්‍රපටය වෙනුවෙන් ඉහත ගීතය කසුන් ලවා ගායන කරවීම හා කසුන් එම ගීයට කල සාධාරණය හදුනා ගැනීමට.. මොකද කුස පබා හා බොම්බෙ තුළ මෙම ගීත යොදාගැනීමේ යම් සමානකමක් තියෙනවා. 

දැන් එතකොට එම ගීය ගායනා කරන අපේ දරුවා?? 

ඔව් එම තරඟය විනිශ්චය සදහා ඇවිත් ඉන්න අපගේ ප්‍රවිණ ගායක මාමා හා නැන්දා 

"අති විශිෂ්ට යි පුතේ ඔයාට හොඳ අනාගතයක් තියෙනවා මගේ සුබ පැතුම් ඔයා ට" 

අඩුම තරමින් එම ගීතයේ අර්ථය කුමක්ද එය කොතරම් දුරට ගැලපෙනවා ද කියලා එම දරුවාගේ හිත නොරිදෙන ලෙස පහදා දෙයි කියලා මම බලාපොරොත්තු වුනා. අවාසනාවට මෙම තරගය විනශ්චයකාරවරුන් ලෙස එදින පැමිණ සිටියේ අපේ රටේ මිනිස්සු බොහෝ ආදරය කරන ගෞරව කරන ජනප්‍රිය ගායක ගායිකා දෙපලක්. ඒ වගේම ඔවුන් දක්ෂ සංගීත ගුරුවරුන් ද වෙනවා. අනෙක් අතට මෙම දරුවන් සදහා ගීත තෝරා දෙන ඔවුන්ගේ ගුරුවරුන් ඔවුන්ගේ වගකීම් හරියට ඉටු කරනවාද? එම දෙමාපියන් තමන්ගේ වගකීම් ඉටු කරනවාද?? මොකද ලංකාව වගේ රටක මාධ්‍ය සදාචාරයක් ගැන කතා කරන එක විහිළුවක් වෙලා ඉවරයි.. 

අවසාන වශයෙන් අපිට අවශ්‍ය තරු දරුවන් ද?? 

නොඑසේනම් ආකල්පමය වශයෙන් සංවර්ධනය වූ ගුණ නැණ බෙලෙන් යුතු දරුවන් ද?? යන්න දෙමාපියන් විසින් සිතා බැලිය යුතු කාළය එළඹ ඇති බව පමනක් සටහන් කරන්න කැමතියි.. 

ගුණ නැණ බෙලෙන් යුතු පුතුමය ඉතා ගරු.. 

ස්ටාර් තරග, ටික් ටොක්...???? 

-වෛද්‍ය සුපුන් උඩුගමකෝරාලගේ -

හුදෙකලාව

නුඹ සමග මා ගෙවූ කාලය

කොතෙක් දැයි මම තවම නොදනිමි

තවත් කොපමණ කලක් වුව මට

හැකිය නුඹ සමගින්ම ඉන්නට

නොමැත කිසි දින අඩ දබර

දුක් සුසුම් හෝ සෝ සුසුම්

මා කියන ඕනෑම දෙයකට

තුෂ්නිම්භූත භාවයෙන් ම අනුමැතිය දෙන

නුඹ වැනිම වූ තවත් කෙනෙක්

නොමැත කිසි දිනෙක කිසි කලෙක

යහළුවන් හෝ නොනෑයින්

ඥාතීන් හෝ පසමිතුරන්

අතර මා හට සොයා ගන්නට

ඉදින් මා ප්‍රිය මිතුර

යහළුව,ඥාතිය

ඉවත්ව යමි 

හුදෙකලාව නම් වූ 

නුඹෙන් 

දියන් මට අවසර...

-සුපුන් උඩුගමකෝරාළගේ-

නඩු දිනය

සැමරුම් 

අතර

ඔබ 

වෙනුවෙන්

ඇති

එකම 

සැමරුම 

නඩු දිනය...

-සුපුන් උඩුගමකෝරාලගේ -

පොත් සැණකෙළිය

ඔයා දැම්මද 

විසිපහයි 

විසිහයයි 

නිවාඩු

විසිඑක ගිහින් වැඩක් නෑ

හුඟක් පරක්කු වෙලා බෑ

ඉරිද නම් වැඩිවෙයි සෙනඟ 

යමුද අපි වෙලා රෑ  

පොරොන්දු වුනා 

ඔයා මට ගිය පාර 

එක්ක යනවයි කියල 

දින දෙකක් මේ පාර

------------------------------

තාම නෑ 

මේ මාසේ පඩිය 

කලින් ම ඇවිත් 

පොත් සැණකෙළිය….

-සුපුන් උඩුගමකෝරාලගේ-

BMICH

ආවා මෙවරත්

කන්න නූල්ඩ්ස්

මෙන්න බොලේ

හැමතැනම

දාලා කඩ, 

පොත්… 

-සුපුන් උඩුගමකෝරාලගේ-

2019 සැප්තැම්බර්

මට හරිම වෙහෙස යි

උදේම 

බැලුම්ගල 

මට හරිම වෙහෙස යි..

දකුණට සිග්නල් 

පාර පුරා ත්‍රී වීල් 

මට හරිම වෙහෙස යි.. 

පහතට විදුරු ව

පාරට කුණු මල්ල 

මට හරිම වෙහෙස යි.. 

ලොකු වෙනකොට වාහනය 

පොඩි වෙනවා ඔළුව 

මට හරිම වෙහෙස යි.. 

නොමැති නිසා 

ලෙඩේට බෙහෙත 

හොයනවා බෙහෙත ට 

ලෙඩ්ඩු 

මට හරිම වෙහෙස යි.. 

නොමැති නිසා පූර්ණය ඝණ 

දානවා කල් මැතිසබය 

මට හරිම වෙහෙස යි.. 

අගමැති ට බෑලු තනියම

බාරගන්න පාඩුවේ වගකීම

ගත්ත කෘෂිකර්මෙට පායේ 

මට හරිම වෙහෙස යි.. 

ඉන්නවා බාගයක් රටෙන් 

වෙන්න අපේක්‍ෂක ජනපති  

තෝරලා මූන්ගෙන් එකෙක් 

මට හරිම වෙහෙස යි.. 

මට

හරිම වෙහෙස යි... 

-සුපුන් උඩුගමකෝරාලගේ-

2019 සැප්තැම්බර් 

ශ්‍රී ලාංකේය තාරුණ්‍ය හා මත්පැන්

ජනාධිපතිවරණය අවසන් වෙලා  හරියටම මාසයක්   වෙනකොට මට මතක් වුණේ ෆේස්බුක් එකේ ඒ දවස්වල ශෙයා වෙච්ච පෝස්ට් කීපයක්. ඒ තමයි ජනාධිපතිවරණය අළලා සිදුවෙච්ච ඔට්ටු ඇල්ලීම්.  ඒ දිනවල ශෙයා වෙච්ච ඔට්ටු බැලුවහම  බහුතරයකම තෑග්ග විදියට තිබුණේ  "මත්පැන්". විශාල වශයෙන් ශෙයා වෙච්ච එක පෝස්ට් එකක තෑග්ග උනේ අරක්කු බෝතල් පහක් බයිට් එකට මස් කිලෝ එකක්. මේ එවැනි එක් ඔට්ටුවක් පමණයි. මෙතනදී මට ආපු ගැටලුව තමයි ඇත්තටම  ඔට්ටු අල්ලන අයට අවශ්‍ය වුණේ තමන් සහයෝගය දක්වන අපේක්ෂකයාගේ ජයග්‍රහණය ද එහෙමත් නැත්නම් අරක්කු ටිකක් බොන්න නිමිත්තක් හදාගන්න එක ද කියන එක. මොකද ජනාධිපතිවරණයෙන් කවුරු සහයෝගය දක්වන අපේක්ෂකයා ජයග්‍රහණය කරත් ඒ ඔට්ටුවට සහභාගී වුනු දෙන්නම තෑග්ග වටා වාඩිවෙන එක අනිවාර්යයෙන් ම සිදු වෙන දෙයක්.... අද වෙනකොට ලංකාවේ තරුණ පරම්පරාවට මත්පැන් පානය සඳහා නිමිත්තක් නොවන දෙයක් නෑ. දරුවෙක්ගේ උපත ඉඳලා මරණය දක්වා. නොඑසේ නම් කොටහළු අවස්ථාවේ සිට  මගුල දක්වා. මේ ඕනෑම අවස්ථාවක් ඔවුන්ට නිමිත්තක්. බණ ගෙදර, පිරිත් ගෙදර, දක්වා මේ සියල්ලම ඔවුන්ට නිමිති. ඉරිදා නිමිත්තක්, පෝය දවස නිමිත්තක්.මේ සඳහා ඔවුන් ට පුදුමාකාර සංවිධාන ශක්තියක් තියෙනවා.අනෙක් කාරණය තමයි මේ විදිහට මත්පැන්වලට ඇබ්බැහි වුනු පුද්ගලයන් ඒ සඳහා දක්වන්න පුදුමාකාර කෑදරකම. පහුගිය දිනවල ශෙයා උන තවත් එවැනිම වීඩියෝ එක් එක් වුණේ ඉන්දියාවේ යම් ප්‍රාන්තයක වහලා තිබුණ මත්පැන් ශාලාවක් විවෘත කරනකොට  ඒ අසලට දිව යන මිනිස්සු. කඩුවක් අමෝරා ගත්ත කෙනෙක් ජීවිතය ඩැහැගන්න තමන්ගේ පිටිපස්සේ හඹාගෙන එනව වගේ ඒ මිනිස්සු මත්පැන් ශාලාව අසලට දිව යන්නේ. ලංකාවෙත්  යම්තාක් දුරකට මෙයට සමාන දෙයක් දැකගන්න පුලුවන්.  ඉදිරි දින දෙක තුළ ලංකාවේ සියලුම මත්පැන් ශාලා වහනවා කියලා නිවේදනය කරානම් එදා දවසේ බාර් ඉස්සරහ  පෝලිම බලාගන්න  පුළුවන්.හරියට මාසෙකට සැරයක් ආණ්ඩුවෙ ඉස්පිරිතාලෙ  ඉස්සරහ සීනි පෙත්ත,ප්‍රේෂර් පෙත්ත, ගන්න මිනිස්සු පෝලින් ගැහිලා ඉන්නවා වගේ. මේ හරහා සිදුවන සමාජ ආර්ථික හානිය අතිවිශාලයි. පවුල් සංස්ථාව බිඳ වැටීම තුලින් සිදුවන සමාජ හානිය. එය රටේ ආර්ථිකයට සිදු කරන හානිය. ලංකාවට මත්පැන් හඳුන්වා දීමේ සිට මේ දක්වා සිදුවී තිබෙන විකාශනය සියුම්ව නිරීක්ෂණය කරන විට සෑබෑ ජාත්‍යන්තර කුමන්ත්‍රණය අප නිසි ලෙස හඳුනාගෙන තිබේ ද යන්න ගැටලුවක් .......

වෛද්‍ය සුපුන් උඩුගමකෝරාලගේ

2019 දෙසැම්බර්